Occitania, nos, vos...

Occitania es un territòri definit per una lenga. Mei que sas termièras naturaus, es l’istòri e lo patrimòni comun aus sons poblans que'n dessenha lo melhor los contors. Mes l'istòria aquesta, vos calerà benlèu cercar un chicòt abans de la trobar…

Occitania se multiplica en sèt províncias. Enfin, mai o mens, pr’amor que conda tanben quauquas tèrras hòrtas que rebotinhan a se deishar encaujar dens un cadre dialectau. Avem causit de conversar dab vosaus dens lo parlar dau parçan nòste, es a díser en gascon pishadèir. Egau, com Occitania es d’aquiu tant com d’acerà, n’avem pas resistit au gai d’emplegar çai e lai un mot, una expression lengedociana, lemosina, provençala ou auvernhata. Nòste pairin e amic Crestian Rapin, linguista e poèta, òmi de terrenh e putz de saber de l’esperit color de nublas, vos parla, quanta d’eth, en son parlar lengedocian d’Agenès.

Cadun de nosaus, de soca o de passatge, que hèi Occitania, la bastís e la definís. Per tant que l’identitat prumèira d’un èster human es en se-medish que residís : cadun de nos es una tèrra.

Mes la Tèrra, la granda, que'n som los mainatges, que nos balha lo jorn e nos neurís, nos contentam pas d’i balhar los nostes còs… Lo mau qu’i hèm cada jorn qu’a miat de mei en mei de personas a se decidir d’agir.

E totun, com estut ricament verqueirada Occitania per la Natura ! Que pòt encercar los orisonts d’una mar e d’un peugue. Que s’eiriça deus pics de duas grandas cadènas de montanhas, se redondís das popas d’un antic massís volcanic. Puishants flumes noiriguèirs, totas las varietats de seuvas de la tèrra temperada… Los òmis, urós d’i víver, qu’i an podut prosperar e construsir ciutats dinamicas.

Mes, avem-nos pas fenit per oblidar los meravilhós presents de la Natura ?

Es d’aqueths constats abarrejadís qu’es vaduda l’idèia de La Lauzeta©.

Es per totas aquèras rasons qu’avem causit aqueth camp d’operacion, e cap d’aute, pr’amor que som convençuts de la sua pertinença e de la sua universalitat.

La Lauzeta© n’es pas un organisme ideologic, quitament pas morau. Es una entrepresa familiau de comèrce en linha. Au nom de que aquò seré incompatible damb idèias (ideaus ?), damb un camin, un biais d’estar ?

Cadun de nos que hèi Occitania.

Siatz hardits !

Nous utilisons des cookies pour améliorer votre navigation sur le site