• Acuelh
  • Presentacion per Crestian Rapin

Presentacion per Crestian Rapin

 

LogoTypo

 

Al moment que lo cosmopolitisme mai o mens aseptizat escurzís l’imaginari dels pòbles e oculta lors culturas pòdem pas que saludar la naissença de l'enterpresa nomenada La Lauzeta©. Lo vèrs celèbre de Bernat de Ventadorn es dins totas las memòrias e cadun sap que la prima espeta Can vei La Lauzeta mover...

La Lauzeta© se propausa de crear e de vendre de produches textils, certificats biologics, e estampats segon los procediments mai evoluïts. Respectuosa de l’ecologia environamentala e umana, realiza sas opcions segon los precèptes d’una vertadièra filosofia que l’amor de la vida en general, de la lenga e del pòble occitan ne son la primièra exigéncia. Son activitat escapa donc de fach als aparelhs ideologics.

Cada jorn, assistissèm a una mena d’expropriacion mentala del ciutadan pels mèdias e per l’escòla. La responsa de La Lauzeta© consistís a tornar metre dins lo corrent del gausiment public tot çò qu’èra estat ocultat pel Poder o monopolizat abusivament pels especialistas. La dilapidacion eventuala de çò que sabèm de la nòstra ìstòria equivaldriá a una feloniá.

Las produccions de La Lauzeta© seràn donc, segon los gostes e las gostas, una colleccion d’imatges o un libre de lectura que i figuraràn de tèxtes quasiment interdiches. Un vertadièr fantascòpi donc. Las intelligéncias frustradas mas abramadas de vertat, e los esperits abosigats traparàn aquí de rasons de viure o de subreviure. Lo temps es vengut de far acarpar las fruchas mai polidas de nòstres verdièrs.

Existís un mejan mai pacific d’acolitrar las molonadas ?

L’aventura es aviada. Compòrta la sia part de risc e lo seu rèiregost de provocacion : La Lauzeta© crèba l’ùou al bèl mitan d’un Estat arrogant que fins ara es totjorn estat ostil a la bigarra dura del mond e que estima que sola sa cultura es de portada universala. Sap pas, aquel Estat, que i a aitant d’universalitats coma i a de culturas.

Es besonh de precisar que, per La Lauzeta©, la preséncia de la lenga occitana es   essenciala ? La Lauzeta© dissèrta pas sus la lenga mas la parla e l’escriu. Aquela lenga es una barralha eficaça enartada fàcia a la societat omnivòra. Remembra a cadun çò que es e de quina riquesa es detentor. L’esprit, lo libèra de las travas que li èran estadas impausadas. Es, per parafrasar los trobadors, la garantida de nòstra jovença e de nòstre jòi.Licorne_La_Lauzeta_Copyright

             

 

                  Crestian RAPIN

Nous utilisons des cookies pour améliorer votre navigation sur le site